Zanzibar Maisha Bora Foundation (ZMBF), Mixx na Yas Business tumesaini Hati ya Makubaliano (MoU) ya kimkakati inayolenga kutumia huduma za kidijitali kunufaisha wakulima wa mwani Zanzibar, hususan wanawake na vijana wanaoshiriki katika programu ya Seaweed Socio-Enterprise.

Makubaliano hayo yametiliwa saini na wakuu wa taasisi zote tatu, Bi. Rehema Tukai, Afisa Mtendaji Mkuu, ZMBF; Bi. Angelica Pesha, Afisa Mtendaji Mkuu, Mixx; na Bw. Norman Kiondo, Afisa Mkuu, Yas Business, katika hafla iliyofanyika Zanzibar na kushuhudiwa na Waziri wa Mawasiliano, Teknolojia ya Habari na Ubunifu Zanzibar, Mhe. Mudrik Ramadhan Soraga.

Ushirikiano huu unatokana na dhamira ya pamoja ya kutumia teknolojia kurahisisha malipo, kuongeza upatikanaji wa huduma za kifedha na kufungua fursa zaidi za kiuchumi kwa wananchi. Kupitia makubaliano haya, Mixx itawezesha wakulima wa mwani kupokea malipo yao kidijitali kwa usalama, uwazi na kasi zaidi, huku wakipata fursa ya kunufaika na huduma kama Kilimo Pesa na Mixx Kikoba za kuweka akiba, kupata mitaji na kukuza shughuli zao.

Mbali na sekta ya mwani, ushirikiano huu pia utasaidia utekelezaji wa programu nyingine za ZMBF ikiwemo Mariam Mwinyi Walkathon na Afya Bora Medical Camps, kwa kutumia mifumo ya kidijitali katika usajili, malipo na uchangishaji wa fedha.

Hatua hii inalenga kuhakikisha kuwa juhudi za maendeleo zinakuwa na tija zaidi kwa jamii, huku zikiwafungulia wananchi, hususan wakulima wa mwani, njia rahisi ya kujikwamua kiuchumi.